Rúntur í Egilssel

8.4.2013 | 18:19

Ekki er setið með hendur í skauti og ekki lætur maður sér leiðast enda er lífið of stutt til þess. Á föstudag var haldið til fjalla, við Billi fórum á Björgunarsveitarhælúxinum ásamt sjö öðrum bílum frá Breiðdalsvík, Fáskrúðsfirði og Reyðarfirði, alls um 20 manns. Ég skildi bílinn minn eftir á Breiðdalsheiði við afleggjarann inn á Öxi og ætlaði mér að sækja hann seinnipart laugardags til þess að komast á hljómsveitaræfingu að lokinni fjallaferð. Lagt var af stað inn á Öxi um kl 17:00 á föstudeginum og ferðinni heitið í Egilssel við Kollumúlavatn. Veðrið var eins og best verður á kosið, bjart en frekar kalt. Komið var við í Bjarnarhíði á leiðinni en færið var þungt og létt til skiptis.

Í Egilssel var komið um kl 22:30 um kvöldið og því orðið skuggsýnt en stjörnur og norðurljós létu ljós sín skína. Skálinn rúmaði ágætlega þennan fjölda en heldur var kalt í skálanum þegar þangað var komið, enda um 12°C frost úti. Fírað var upp í kamínunni og fólk tók hraustlega til matar síns í kuldanum eftir ferðalagið. Það passaði til að þegar var að byrja að hlýna í skálanum voru flestir að skríða í svefnpokana og allir steinsváfu til morguns.

Að morgni laugardags var haldið af stað í sólskini og frosti og byrjað var á því að fara í Tröllakróka sem eru hrikalegir en afskaplega fallegir. Ef fólk er vel ferðafært ætti það ekki að fresta því lengi að skoða þá.

Svo var haldið til baka og þegar í Bjarnarhíði var komið ætlaði hópurinn að halda áfram á aðrar slóðir en tímabært var fyrir mig að halda í bílinn minn til þess að ná hljómsveitaræfingu. Bíllinn var í um 18 km fjarlægð og tveir vaskir snjósleðamenn skutluðu mér með skíðin áleiðis og svo fór ég á gönguskíðunum síðustu 7 kílómetrana. Það var ljúft að leggjast í heita pottinn við sundlaugina á Egilsstöðum að loknum góðum og hressandi túr.

Flokkur: Bloggar | Facebook