Meira jákvætt

Mér finnst vera margt jákvætt að gerast á þessum stað.  Byrjum á strandveiðunum.  Ætli séu ekki einir 11 bátar hér á strandveiðum sem annars hefðu ekki verið að róa, auk þeirra sem eru að veiða kvótann sinn.  Það þýðir að um 15 manns hafa af þessu beinar tekjur auk þess sem tekjur hafnarinnar aukast, þar að auki fá ýmsir þjónustuaðilar óbeinar tekjur af þessu.  Nú er hver sótraftur dreginn á flot og ánægjulegt að sjá menn sem aldrei hafa verið í útgerð slá til og prófa auk þess sem gamlir jálkar eru farnir að róa.

Það er líka ánægjulegt að sjá ný fyrirtæki verða til.  Bátasmiðja, sú eina sinnar tegundar hér á landi tekur til starfa innan skamms og þar munu nokkrir menn hafa atvinnu.  Handverkið blómstrar nú sem aldrei fyrr og er greinilega á uppleið. Já og svo er búið að opna hina glæsilegu Bakkabúð.

Allt þetta til samans skapar a.m.k. tuttugu manns atvinnu til lengri eða skemmri tíma og munar um minna á ekki stærri stað. 

Jæja þetta nú er komið nóg af jákvæðni.  Er ekki orðið tímabært að tala um eitthvað neikvætt?  Nei ég nenni því ekki.

Athugasemdir

[haukur Gunnarsson (IP-tala skráð) 14.7.2010 kl. 00:20]

En er ekki vinnan tekin frá einhverjum öðrum, eða hefur fiskunum fjölgað í sjónum? ER þessi aðferð kannski líka dýrari fyrir þjóðarbúið? Gott að vera jákvæður, en líka að vera raunsær.