Kafað í Nykurhyl

Við fórum í dag fimm kafarar í skemmtilega köfun í Nykurhyl í Fossá.  Hylurinn kemur á óvart en hann er um 9 metra djúpur og nokkuð stór um sig.  Stór björg eru upp með þeim hluta sem beljandi fossinn steypist niður í hylinn.  Töluvert af smábleikju er í hylnum en að þessu sinni urðum við ekki varir við lax.  Það er mikill munur á að kafa í ferskvatni og í sjó en skyggni í ferskvatni er yfirleitt mun betra en í sjó. 

Hylurinn sem heitir Nykurhylur er neðan við neðsta fossinn í Fossá og dregur nafn sitt af því að í honum átti að vera Nykur. Nykur er þjóðsagnavera sem á að líkjast hesti í útliti en öfugt við hesta eins og við þekkjum þá snúa hófarnir aftur og hófskeggin fram á nykrum.  Samkvæmt þjóðtrúnni er Nykra að finna í ám og stöðuvötnum og jafnvel sjó. Nykurinn reynir gjarnan að tæla menn á bak sér. Þeir sem fara á bak sitja þar fastir með einhverjum hætti en nykurinn hleypur óðar að vatninu þar sem hann á sér óðal og steypir sér á kaf og drekkir þeim sem á honum situr. Hann þolir ekki að heyra nafn sitt nefnt, en heyri hann það tekur hann viðbragð og hleypur í vatnið. Lengi vel var reynt að losna við Nykurinn úr hylnum í Fossánni en það tókst ekki fyrr en skírnarvatni var hellt í hann eftir skírn á einum af bæjunum á dalnum.  Enda sáum við engan nykur þarna í dag.

Nú stendur til að nota vatn úr hylnum til útflutnings en tankskip, allt að 80.000 tonn, munu þá liggja við akkeri út á firðinum á meðan þau eru fyllt af vatni úr hylnum og vatnið er svo ætlað til landbúnaðar og iðnaðarnotkunar á vatnslitlum svæðum við Miðjarðarhaf.  Þá er spurning hvort hægt verði að kafa í hann eftir að þær framkvæmdir verða orðnar að veruleika.