Pressa

Nú í nóvember síðastliðinn ákvað ég að vera duglegur að taka ljósmyndir í desember, en desember  er fallegur mánuður ef maður horfir í kring um sig og drekkur í sig skammdegisbirtuna.   Síðan útbjó ég möppu á Facebook  þar sem ég sló því fram að ég myndi setja inn að minnsta kosti eina mynd á dag í desember.  Þar með var ég búinn að setja á mig mikla pressu en sama hvað, ég varð að ná einni góðri mynd á dag.  Það hljómar einfalt en þegar myndavélin sem notuð er í verknaðinn er þeim kostum gædd að verulega erfitt er að taka óhreyfðar myndir í fókus auk þess sem þær verða aldrei nógu hreinar, enda mistókust nokkrar myndir sem hefðu verið svakalega góðar EF maður hefði haft betri myndavél í höndunum.   Allavega kom þetta betur og betur í ljós eftir því sem leið á mánuðinn en samfara meiri myndatöku fer maður ósjálfrátt að spá meira í samsetningu og gæði myndanna.  Pressan að koma með mynd var, ég segi kannski ekki óbærileg, en hún var alltaf til staðar og því er eins og maður sé kominn í sumarfrí núna eftir þessar desembermyndatöku.  Verkefnið var samt afskaplega skemmtilegt og ég fékk margar fallegar athugasemdir  við myndirnar í möppunni og fyrir þær er ég þakklátur.  Nú er það hins vegar orðið nokkuð ljóst  að það verður ekki hjá því komist að fjárfesta í þokkalegri myndavél, enda er maður orðinn gagnrýnni á sjálfan sig hvað þetta varðar.

Her eru nokkur sýnishorn en megi annars nýja árið færa ykkur gleði og hamingju.

Athugasemdir

[Magnús Sigurðsson, 1.1.2011 kl. 22:39]

Gleðilegt ár Kristján.  Það hefur verið gaman að skoða myndirnar þínar.  Vonandi tekurðu einhvertíma árið í að ná góðri mynd á hverjum degi, þú hefur allavega umhverfið og augað fyrir því.

[S Kristján Ingimarsson, 2.1.2011 kl. 18:32]

Gleðilegt ár Magnús.  Takk fyrir þetta, já það er ekki laust við að áhugi á myndatöku hafi aukist með þessari desemberseríu.

[Jóhann Atli (IP-tala skráð) 3.1.2011 kl. 23:51]

Glæsilegar myndir hjá þér, hvaða myndavél ertu að nota í þetta?

Þekki þetta með pressuna, setti inn eina mynd á dag í allt sumar. Samtals urðu þær 98.

[S Kristján Ingimarsson, 4.1.2011 kl. 00:31]

Takk fyrir það.  Ég var mest að nota Olympus FE 280 sem ég keypti sérstaklega til að taka myndir neðansjávar.  Hún er ágæt sem slík en ég mæli ekki með henni fyrir landslags eða mannamyndir.