Brúargarðsbaugurinn

Í dag tók ég mér rúnt upp að Brúargarðsbaugi (Ring of Brodgar) sem er hérna á milli Kirkjuvogs og Straumness.  Brúargarðsbaugurinn er mjög svo dularfullt og merkilegt fyrirbæri sem stendur á milli tveggja stöðuvatna Héraðslagar (Loch Harray) og Steinsneslagar (Loch Stenness).  Fyrirbæri þetta samanstendur af stórum steinum, sumum allt að fimm metra háum, sem hefur verið raðað í fullkominn hring en ekki ósvipað fyrirbæri er suður á Englandi og nefnist Stonehenge en margir hafa heyrt þess getið. 

 

 

 

 

 

 

 

Brúargarðsbaugurinn (Þú getur smellt á myndirnar til þess að sjá þær betur).

 

Hringurinn er um 100 metrar í þvermál og talið er að upphaflega hafi steinarnir verið 60 talsins en nú standa 27 steinar uppi, jafnt bil hefur verið á milli þeirra og skurður, 3 m djúpur og 10 m breiður hefur verið grafinn í kringum bauginn.  Þó að ekki sé vitað nákvæmlega hversu gamall þessi steinhringur er, þá er talið að hann sé frá nýsteinöld og sé því 4000 - 4500 ára gamall.  Steinarnir eru úr mismunandi bergi sem bendir til þess að þeir hafi verið fluttir frá hinum ýmsu eyjum úr Orkneyjaklasanum. 

 

 

 

 

 

 

 

Brúargarðsbaugurinn.

 

Stakur steinn stendur svo í u.þ.b. 200 - 300 m fjarlægð og ekki er vitað hvernig stendur á því en þjóðsaga segir, að eitt sinn hafi tröllin á Orkneyjum komið þarna saman  til þess að dansa hringdans og fiðluleikarinn hafi stillt sér upp spölkorn í burtu.  Svo þegar sólinn kom upp urðu öll tröllin að steinum.  Kannski er þetta ekki líklegasta skýringin á þessu fyrirbæri en skemmtileg er hún engu að síður.

 

 

 

 

 

 

 

 

 

 

 

 

 

 

 

Tröll?

 

Ekki er vitað hver tilgangur hringsins var, en ef til vill hafa einhverskonar samkomur verið haldnar þar.  Fornleifafræðingar hafa verið við störf þarna og í nágrenninu undanfarin sumur og alltaf er eitthvað nýtt að koma í ljós.  Nei alltaf er eitthvað gamalt að koma í ljós.

Það sem gerir þetta enn dularfyllra er, að rúman kílómeter í burtu eru Steinsnessteinarnir (Stones of Stenness).  Það er annar svona steinahringur heldur minni, eða um 30 m í þvermál og samanstóð af 12 steinum en steinarnir eru reyndar hærri, eða um 6 m háir. 

 

 

 

 

 

 

 

Steinsnessteinarnir

 

Svæðið með hringjunum tveimur er á heimsminjaskrá UNESCO.  En hver var tilgangurinn með þessum hringjum?  Af hverju voru steinar sem vógu nokkur tonn fluttir þangað frá öðrum eyjum?  Hvaða tækni notuðu nýsteinaldarmenn við að flytja steinana, reisa þá og reikna út staðsetninguna? Af hverju eru tveir hringir svona nálægt hvor öðrum?  Af hverju standa stakir steinar skammt frá? Tengist þetta sólinni og tunglinu?  Þessum spurningum og mörgum öðrum varðandi Brúargarðsbauginn og Steinsnessteinana fæst sennilega aldrei svar við.

Athugasemdir

[Magnús Sigurðsson, 22.2.2015 kl. 08:18]

Sæll Kristján, alltaf jafn gaman að fylgjast með ævintýrum þínum á Orkneyjum. Ég sé að þú ert farin að uppgötva leyndardóma eyjanna, sem hafa að geyma mörg þúsund ára sögumenjar auk merkilegra tengsla við íslendingasögurnar. Eitt af því er Skara Brae.

https://www.youtube.com/watch?v=de4kOrOaNyI

[S Kristján Ingimarsson, 22.2.2015 kl. 12:48]

Sæll Magnús.  Skara Brae er einn af þeim stöðum sem ég á eftir að heimsækja en hér verðist vera af nógu að taka.  Ég gæti ímyndað mér að Orkneyjar séu áhugaverðar fyrir þá sem hafa áhuga á fornleifafræði en ekki síður fyrir þá sem hafa áhuga á steinhleðslum.  Hér er mikil hefð fyrir því að nota steina í ýmis konar hleðslur, hús, girðingar og fleira og ég hef séð steinhleðslumenn við störf á nokkrum stöðum hér þannig að þeir viðhalda hefðinni.

[Magnús Sigurðsson, 22.2.2015 kl. 15:52]

Það voru einmitt steinhleðslur í Noregi sem urðu til þess að ég gaf Orkneyjum gaum. Í kaupbæti komst ég svo að því að þeir synir Rögnvaldar Mærajarls tengdust eyjunum. Einn þeirra Hrollaugur nam Hornafjörð og við hann eru kenndar Hrollaugseyjar. Annar var Göngu Hrólfur forfaðir Normandí Normanna sem breska konungsættin er rakin til. Auk þessa er Auður Djúpúðga sögð hafa lagt upp frá Orkneyjum til Íslands þegar hún nam land í Dölum.