Takk Grikkland, takk Evra, takk Írland.

Á þriðjudag fáum við afhentan vinnubátinn sem við munum nota til þess að þjónusta eldisstöðina okkar við Vigur (Wyre).  Hann hefur fengið nafnið Gairsay Sound (Geirseyjarsund) og er 16 m langur, 6,5 m breiður, með tvær 320 Hp Doosan vélar, smíðaður af Arklow Marine í Arklow á Írlandi.  Báturinn er útbúinn öllu því helsta sem góður vinnubátur fyrir fiskeldi þarf á að halda og siglingatækin eru frá Raymarine.  Þar sem ég er að fara í sumarfrí á sama tíma næ ég hvorki að vera viðstaddur afhendinguna né að sigla bátnum upp til Orkneyja en það verður án efa skemmtilegt ævintýri sem mun taka 3 - 4 daga.  Það er svo sem í góðu lagi, það hefði bara þýtt að ég hefði þurft að fara til Írlands, drekka Guinness, sigla upp Írska hafið, gista á ókunnum stöðum á Norður Írlandi, og vesturströnd Skotlands. 

Þegar skrifað var undir kaupsamning á bátnum síðastliðið haust átti hann að kosta sem svarar 90 milljónir króna.  Kaupverðið var í evrum sem er sá gjaldmiðill sem Írar hafa kosið að nota en vegna gengisfalls evrunnar gagnvart pundinu hefur kaupverðið lækkað um um það bil 10% og er nú komið niður í rúmar 80 milljónir og má að stærstum hluta til rekja þennan tíu milljóna króna gróða til atburða í Grikklandi.  Írsku skipasmiðirnir hafa samt staðið sig vel, þar eru fagmenn á ferð og báturinn lítur vel út.  Ég er ekki enn kominn með almennilegar myndir af honum sem má birta, það verður að bíða betri tíma.