Aumingja Betty Corrigall

Þegar ég fór til Háeyjar um daginn gerði ég stuttan stans við gröf Betty Corrigall en hún er staðsett á einskis manns landi uppi á hæð á miðri eyjunni.  Og það er ástæða fyrir því.  Betty bjó á Háey á seinni hluta 18. aldar og svo óheppilega vildi til að hún varð vanfær af völdum sjómanns á eyjunni sem stakk af og fór á sjóinn.  Það þótti mikil skömm að eiga lausaleiksbarn og Betty var fordæmd af eyjarskeggjum.  Þetta varð Betty óbærilegt og hún reyndi að ganga í sjóinn en var bjargað en það dugði skammt því að nokkrum dögum síðar hengdi hún sig.  Ekki var leyfilegt að grafa þá sem frömdu sjálfsmorð í vígðum grafreit og því var Betty holað niður í ómerkta gröf á miðri eyjunni.  Þar lá hún allt til ársins 1933 þegar tveir mótekjumenn grófu niður á trékassa.  Þeir töldu sig hafa fundið fjársjóð og fóru með kassann til póstmeistara eyjarinnar þar sem hann var opnaður.  Kom þá í ljós lík ungrar konu sem hafði varðveist vel í mónum. Eftir rannsókn lögreglu var ákveðið að grafa hana aftur niður á sama stað.  Árið 1941 voru tveir hermenn við mótekju á sama stað og rákust aftur á trékassann.  Þeir skoðuðu innihaldið en grófu hann svo aftur.  Félagar þeirra í hernum voru forvitnir og hún var grafin upp og niður nokkrum sinnum á meðan heimsstyrjöldin síðari stóð yfir.  Offiserunum var tilkynnt þetta og svo fór að þeir létu steypa yfir gröfina til þess að koma í veg fyrir sífelldan upp og niðurgröft.  Árið 1949 kom Amerískur prestur í heimsókn á eyjuna og hann hélt stutta athöfn yfir gröfinni auk þess að reisa litla girðingu í kringum hana.  Árið 1976 var svo settur legsteinn á gröfina og athöfn haldin og þar með fékk Betty að hvíla í friði, tæpum 200 árum eftir andlátið. 

Athugasemdir

[Erla Magna Alexandersdóttir, 9.7.2015 kl. 21:26]

jasso-- hefur einhver karl fengið svona meðferð við að eiga barn utan hjónabands-- eg bara spyr 

[S Kristján Ingimarsson, 10.7.2015 kl. 08:08]

Tja, ekki skal ég fullyrða en það kemur enginn upp í hugann, reyndar engin önnur kona heldur sem hefur fengið samskonar meðferð, vonandi er þetta einsdæmi.