Djúpivogur - Djúp - Djúpivogur

Halló.

Á mánudaginn kl sex lagði ég af stað í Egilsstaði.  15 klst síðar var ég í flugvél sem sleikti vestfirsk fjöll í aðflugi að Ísafjarðarflugvelli.  Tilgangurinn var að funda með Vestfirskum fiskeldismönnum hjá Gunnvöru og Stofnfiski.   Fór til Súðavíkur og um borð í brunnbátinn okkar, Papey, og kíkti í sláturhúsið þeirra og lifrarvinnsluna.  Í nesti fékk ég þrjár dósir af niðursoðinni þorskalifur sem ég hlakka til að smakka á og bjóða upp á í vinnunni ásamt vænni sneið af rúgbrauði með smjöri.  Að þessu loknu var haldið langleiðina út í Hnífsdal, í Hraðfrystihús Gunnvarar.  Þar var sest niður og spjallað vítt og breitt um fiskeldi auk þess sem vinnslulínan var skoðuð. 

Þetta er í fyrsta skipti sem ég kem á Vestfirði og það er alltaf gaman að sjá eitthvað nýtt.  Það var svo sem ekki margt sem kom á óvart nema kannski helst hvað er stutt á milli staða þarna við Djúpið, ég hélt að það væri lengra.  Ísafjörður hefur nokkra kosti eins og vingjarnlegt fólk, marga pöbba miðað við fólksfjölda, gott skíðasvæði, Mugison og svo tónlistarhátíðina Aldrei fór ég suður.  Það hefði nú verið fínt að hafa þessa heimsókn um páskana og nýta ferðina í að fara á Aldrei fór ég suður.   Það eru örugglega einhverjir ókostir líka en mér fannst allavega frekar drungalegt þarna í skammdeginu (eins og sést kannski á myndunum) enda fékk ég nokkuð dæmigert vestfirskt veður (held ég).  Allavega var þetta hin ágætasta ferð og að mörgu leiti gagnleg.

Dagurinn í dag fór í ferðalag heim og smá fund í Reykjavík.  Nú er komið miðvikudagskvöld og ég kominn heim aftur og Chelsea búið að vinna Olympiakos \o/\o/\o/.  Það stóð til að ég færi til Miami í Florida í næstu viku á skemmtiferðaskipakaupstefnu en vegna anna í fiskeldinu baðst ég undan því.  Það bíður bara betri tíma.

Bless.