Hver er Sigríður?

Skítaveður. Það er víst að koma vetur hér, fyrsti vetrardagur á laugardag og Mörsugur að byrja. 

Middlesborough, Sunderland, Hull, Stoke, er þetta listi yfir þau lið sem munu falla úr ensku úrvalsdeildinni í vor? Nei þetta eru nokkur af þeim liðum sem hafa unnið Tottenham í haust.  Það er með ólíkindum að horfa upp á þetta Tottenham lið tapa fyrir hverju smáliðinu á fætur öðru.  Þeir eru reyndar búnir að eiga einhver stangarskot og svona en það voru varnarmenn sem áttu þau skot, allavega var þeim stillt upp sem sem varnarmönnum, maður er ekki alveg að átta sig á leikskipulaginu og hver spilar hvar.  Ég er viss um að ég gæti smalað saman fimm manna liði sem gæti unnið Tottenham eins og það er að spila núna.  Með bundið fyrir augun.

Síðustu dagar hafa verið óreglulegir í vinnunni og sjávarföllin hafa stjórnað vinnutímanum en við höfum verið að taka botninn á Sigurrós í gegn en það er víst skylda að botnskoða báta á tveggja ára fresti.  Þrjár fjörur og fjögur flóð var sá tími sem þurfti til þess að vinna verkið.

Það voru víst einhverjir mótmælendur að krefjast þess að Davíð Oddsson segði af sér.  Ég held að það þurfi meira til.  Það getur vel verið að hann sé ekki starfi sínu vaxinn en ég er hræddur um að það séu fleiri, hvernig er t.d. með þá sem réðu Davíð í Seðlabankann?

Biggi Thorberg benti á að Soulwax væri mjög vanmetin hljómsveit og ég skal viðurkenna að ég hef ekki heyrt neinn annan en Bigga tala um þessa hljómsveit.  Kannski er þetta vegna þess að hún er Belgísk, en Belgísk tónlist hefur ekki verið fyrirferðamikil hér á landi, ég man bara eftir Vaia Con Dios og svo rámar mig í einhverja tekknósveit líka.  Á Jútjúb eru nokkur myndbönd með þeim og hér er eitt.  Þetta er nú ekki svo slæmt, kannski við ættum öll að reyna að koma af stað Soulwax bylgju.