Lucky

20.1.2009 | 21:09

Dagurinn skiptist í skrifstofudag fyrir hádegi og svo köfun eftir hádegi. Við Billi köfuðum þvers og kruss í leitarköfun um voginn en fundum ekki það sem við leituðum að. Reyndar var skyggnið ekki nema um 0,7 m þannig að það var svo sem ekki við árangri að búast. Í staðinn fundum við dælubarka, nokkur dekk, rennu, tunnu, stígvél, prentara (Hewlett packard), bjórdósir, hníf og eitthvað fleira smádót. Annars er það með ólíkindum hvað maður getur orðið áttavilltur þarna niðri en Billi var með áttavita til þess að halda réttri stefnu og svo vorum við með spotta á milli okkar til þess að halda hæfilegri fjarlægð. Aldrei fannst mér við vera á réttri leið. Einu sinni prófaði hann að stoppa en ég hélt áfram með spottann í hendinni og synti í hringi í kring um hann. Í lok köfunarinnar þurftum við að brasa svolítið undir Sigurrós en skugginn af henni gerði það að verkum að það var kolniða myrkur þar niðri ekki bætti það skyggnið að við rótuðum upp drulluskýi þannig að skyggnið varð ekki meira en svona 5 cm. Við náðum þó að klára og vorum komnir uppúr stuttu síðar, eftir u.þ.b. klukkutíma í kafi. Yfirleitt eru svona 4 - 6 kafanir á mánuði hjá okkur.

Nú er að komast aðeins meiri mynd á Noregsferðina en ég flýg út til Bergen 10. feb með viðkomu í Osló og svo heim föstudaginn 13. með viðkomu í Kaupmannahöfn. Maður lifir nokkuð áhættusömu lífi og með því að fljúga á föstudegi 13. er maður náttúrlega að storka örlögunum. Svo bað Íris mig í gær að fara með spegil í ruslið og brjóta hann, veit ekki alveg hvort þessi tímasetning sé tilviljun. Já og svo náttúrlega gekk svartur köttur í veg fyrir mig í morgun þegar ég var að fara í vinnuna, hmmm. Ég er nú ekki hjátrúarfullur maður og spái ekkert sérstaklega í þessa hluti. Það er samt til fólk sem er mjög hjátrúarfullt og það er til hugtak, eða orð, á enskri tungu yfir það að vera með fóbíu fyrir föstudeginum þrettánda og þetta er að sjálfsögðu orðið paraskevidekatriaphobia.