Kafað í Hamrsfirði

Í dag var skroppið í köfunarleiðangur og stefnan var tekin á Miðfjarðarskerið í Hamarsfirðinum.  Þeir sem tóku þátt voru auk mín, Billi og Jón Ingvar og Gunnar Flóki sem var skipstjóri.  Sker þetta er hálfgerður kambur sem kemur upp úr á fjöru en hverfur í kaf á flóði.  Dýpið í kringum hann er 6 - 9 metrar, og það sem helst er að sjá þarna eru ígulker, kræklingur, sæbjúgu, kuðungar, hörpudiskur, skarkoli og krabbar.  Alltaf er nú hressandi að skella sér niður og vonandi komumst við fljótlega aftur en þá er stefnt á að tína skelfisk og elda eftir köfunina.  Ég tók nokkrar myndir í leiðangrinum, sem og eitt stutt myndband þar sem m.a. má sjá fjöldann allan af ígulkerjum, hrúðurkarl að snæðingi og krabba í göngutúr.

Athugasemdir

[Óskar Ragnarsson (IP-tala skráð) 22.3.2009 kl. 23:51]

Þetta er alveg magnað. Nóg líf þarna virðist vera. Með hvernig vél ertu að taka þetta video?

[S Kristján Ingimarsson, 23.3.2009 kl. 07:42]

Já, það er hellings líf þarna, þetta er nú bara tekið á venjulega litla myndavél, Olympus FE-230, sem reyndar er með kafarahulstri.  Annars er ég nokkuð sáttur við myndirnar og líka hissa á hvað hljóðið skilar sér.