Þorskeldi

Nú er þorskeldi lokið í Berufirði og reikna má með að laxeldi taki við í framtíðinni.  Töluverð reynsla og þekking hefur áunnist í aleldi á þorski og ég myndi treysta mér að gera þorskeldi hagkvæmt innan fimm ára að því gefnu að aðstæður á markaði og fóðurverð verði hagstæð.  Það hefur lengi legið ljóst fyrir að helstu vandamálin liggja í klaki og seiðaeldi og smám saman hefur verið að skýrast hvað það er sem þarf að laga til þess að ná betri árangri.

Klak

Þó nokkur óstöðugleiki hefur verið í hrognaframleiðslu en það kemur fram í því að seiðaframleiðsla hefur sveiflast á milli 50.000 stk og 600.000 stk framleiðslu á ári.  Misjafnlega hefur gengið að frjóvga hrogn við klak en lifunarhlutfallið hefur verið lágt fram til þessa.  Helstu ástæður sem nefndar hafa verið eru að klakfiskurinn þurfi að ganga í gegnum náttúrlegar sveiflur bæði hvað varðar birtu og hitastig en einnig hefur verið talað um að það fóður sem notað hefur verið uppfylli ekki næringarþarfir klakfisks nægilega vel með tilliti til hrognafrjóvgunar.  Lítið hefur komið út úr rannsóknum á þessu sviði en nú er unnið að rannsóknum t.d. með því að láta klakfiskinn ganga í gegnum náttúrlegar árstíðasveiflur.

Seiðaframleiðsla

Samkvæmt rannsóknum eru fyrstu fimmtíu dagarnir í eldinu afar krítískir.  Á þeim tíma er vaxtargetan í hámarki og framtíðarvöxtur stjórnast að miklu leiti af því hvernig til tekst á þessum fyrstu vikum eldisins, þ.e.a.s. ef góður vöxtur næst á þessu tímabili, skilar það sér í stærri fiski í sjókvíaeldi.  Því er afar mikilvægt að ná sem bestum vexti á fyrstu dögunum en því væri hægt að  ná með hentugra fóðri. 

Rannsóknir hafa sýnt fram á að það fóður sem nú er notað, Artemía og hjóldýr, henta ekki næringarþörfum þorskseiða nægilega vel. Fyrsti hluti startfóðrunar sker úr um þróun þarma og lifrarvöxt en gerð var rannsókn á áhrifum frumfóðrunar með dýrasvifií stað hjóldýra og artemíu á þorsklirfur. Niðurstaðan var sú að þorskalirfur fóðraðar eingöngu á dýrasvifi uxu mun betur en lirfur sem fóðraðar voru á  hjóldýrum og var munurinn greinilegur eftir 8 daga auk þess sem lifun hjá lirfum sem fóðraðar voru á dýrasvifi var mun betri.  Ennfremur  hafa verið gerðar tilraunir með að gefa dýrasvif að hluta og það hefur skilað betri vexti og lifun en gamla aðferðin að nota eingöngu hjóldýr og Artemíu.

Rannsóknir hafa einnig sýnt að auk þess sem vöxturinn verður betri með dýrasvifi hafa seiðin verið hraustari og stressþol eykst  en afföll á seiðastigi hafa verið minni hjá seiðum sem fóðruð eru með dýrasvifi.  Í Noregi beina menn helst sjónum að seiðaeldinu í því skyni að koma þorskeldi á lappirnar og þá er fyrst og fremst horft til frumfóðrunar.  Í febrúar s.l. var haldin þorskeldisráðstefna í Bergen og var hún að stórum hluta helguð seiðaeldi og fóðrun í seiðaeldi.

Enn sem komið er eru ekki fáanleg bóluefni til þess að bólusetjaseiði gegn kýlaveikibróður en það er sá bakteríusjúkdómur sem helst leggst á eldisþorsk.  Tilraunir með bóluefni hjá Pharmaq eru í gangi og hafa þær tilraunir gefið jákvæðar niðurstöður og vonandi er ekki langt að bíða þess að það verði aðgengilegt.

Flutningur á lifandi fiski.

Flutningur, meðhöndlun og aðrir stressvaldandi þættir vara afskaplega illa í eldisþorsk.  Mestu afföllin verða í sjókvíunum fyrstu vikurnar eftir að seiðin eru sett í kvíar.  Samkvæmt rannsóknum á laxaseiðum þola þau illa það álag sem er á þeim við flutninginn en það veldur hækkun á magni kortisols sem er hormón sem myndast við langvarandi stress og getur gengið af fiskinum dauðum.  Það hefur greinileg áhrif ef það tekur langan tíma að afgreiða seiði í brunnbát og ef ferðin með brunnbátnum tekur langan tíma og mikil hreyfing er á leiðinni ýtir það líka undir stress hjá fiskinum og veldur skaða á fiskinum.  Þetta passar við þá reynslu sem við höfum af flutningi á þorskseiðum en minnstu afföllin hafa verið þegar seiðin hafa verið flutt með bíl.  Lausnin við þessu miðað við núverandi aðstæður er sú að lágmarka alla meðhöndlun og  stytta alla flutninga eins og kostur er, t.d. með því að nota bíla við flutningana en það getur hins vegar orðið dýrt þegar fram í sækir og magnið fer að aukast en seiðastöðin þarf að vera eins nálægt sjókvíastöðinni og kostur er.

Með því að laga þessi atriði ætti að nást meiri vöxtur og minni afföll og þar með kemst aleldi á þorski nær því að verða hagkvæmt miðað við það sem reynslan fram að þessu hefur verið.

Sprett úr spori

Laugardagur var sannkallaður maraþondagur.  Ég hafði fyrr í sumar skráð mig í Reykjavíkurmaraþon en í fyrra hljóp ég hálft maraþon og það var svo bráðskemmtilegur viðburður að fljótlega var ákveðið að fara aftur á þessu ári.  Spurningin var bara hvort ég ætti að taka hálft maraþon aftur og reyna að bæta tímann minn eða bæta við mig og fara heilt maraþon.  Niðurstaðan varð að ég skráði mig í heilt maraþon.  Ég var búinn að vera í meðallagi duglegur að hlaupa en ýmislegt hindrar mann í að æfa eins vel og þyrfti.  Ég hafði aldrei hlaupið svona langt áður og því var fyrsta markmiðið að komast alla leið.  Annað markmið sem var sett út frá því sem ég hafði hlaupið styttri vegalengdir á, var að hlaupa þetta á 4 - 4 ½ tíma.  Svo las maður sig aðeins til um svona og það sem maður græddi helst á því var að maður þarf að vera viðbúinn því að hlaupa á vegg eins og það kallast skömmu eftir 30 km.  Þá er ráðið að hægja á sér og innbyrða orku til að klára hlaupið.  Margir segja líka að svona hlaup sé ekki síður andleg raun en líkamleg. 

Þegar ég nálgaðist Lækjargötuna í blíðskaparveðri á laugardagsmorguninn heyrði ég óm af Born to run með Bruce Springsteen í hátalarakerfinu og jafnframt fór eftirvæntingin hjá hlaupurunum vaxandi.  Kári Steinn Karlsson ólympíumaraþonhlaupari ræsti svo hlaupið og mannhafið rann af stað.  Alls staðar meðfram götunum var fólk að hvetja hlauparana til dáða.  Allt gekk að óskum og eftir 30 km var ég búinn að vera 3 klst á hlaupum, allt samkvæmt áætlun.  Eftir c.a. 32-33 km fóru verkir í kálfum að gera vart við sig sem varð til þess að heldur dró úr hraðanum.  Var þetta veggurinn? Ég veit það ekki, ég allavega fékk mér orkugel og dröslaðist áfram og oft á tíðum hugsaði ég um það sem Lance Armstrong sagði: "Pain is temporary, quitting lasts forever" þannig að ekki kom til greina að gefast upp.  Þegar um 37 km voru að baki voru verkirnir komnir í lærin og enn styttust skrefin og hægðist á manni.  Það eru til ýmiskonar trikk sem hlauparar nota til að reyna að gleyma sársaukanum sem fylgir síðustu kílómetrunum s.s. Að reikna flókin reikningsdæmi í huganum, syngja lag, lofa sjálfum sér verðlaunum að hlaupi loknu og ýmislegt fleira.  Þegar 40 km skiltið birtist svo þá var eins og létti á manni,  aðeins tveir km eftir, skrefin lengdust aftur og það var afskaplega ánægjulegt að hlaupa inn Lækjargötuna meðfram mannfjöldanum og ná að klára heilt maraþon með sóma, reyndar á frekar slökum tíma 4 ½ klst sem er reyndar innan þeirra marka sem búast mátti við.  Að hlaupi loknu var gott að setjast niður teygja á og fá sér vatn og saltkringlu.  Ég hafði ekki lyst á meira Powerade enda búinn að innbyrða það öðru hvoru allt hlaupið.  Svo var haldið í sund til þess að láta þreytuna líða aðeins úr sér en það var svo sem ekki hægt að slóra mikið þar af því að ég þurfti að ná flugi á Egilsstaði þar sem ég átti að spila á Dansleik í Valaskjálf.  Ég bjóst við mikilli þreytu þegar færi að líða að balllokum en stemmingin og gleðin á ballinu var ekki síðri en í Lækjargötunni og þreytan kom aldrei yfir mig.  Það var samt gott að leggjast á koddann um hálf fimm leitið  enda ekki hægt annað en að vera sáttur eftir svona góðan dag.

Vor

Dagana 10. - 19. ágúst stóð yfir Ormsteiti á Fljótsdalshéraði.  Ég var hvattur til að senda inn lag í svokallaða Ormsteitislagakeppni sem haldin var þann 10. ágúst.  Ég lét til leiðast og sendi inn lag sem ég samdi í fyrrahaust og kallast Vor.  Þó nokkur fjöldi laga barst í keppnina en tíu voru valin til þess að keppa til úrslita og það var mér gleðiefni þegar ég fékk þær fréttir að lagið hefði komist í úrslit auk annars lags sem ég sendi sem kallast Sumarið er hér.  Þar sem ég sá ekki fram á að hafa tíma til að syngja þetta sjálfur fékk ég einn besta söngvara hér austanlands, Andra Bergmann til þess að syngja það fyrir mig.  Í hljómsveitinni sem sá um undirleik í keppninni var valinn maður í hverju rúmi, henni var stjórnað af Jóni Hilmari Kárasyni gítarsnillingi, en auk hans voru Daníel Arason á hljómborð, Marías Kristjánsson trommari og Þorlákur Ágústsson á bassa.  Allir eru þeir frá Neskaupstað enda er Neskaupstaður annálaður tónlistarbær og sennilega er það að stórum hluta Ágústi Ármanni Þorlákssyni að þakka.  Þegar öll lögin höfðu verið flutt kom að því að skera úr um hvaða lag myndi sigra og það var gert bæði með símakosningu, sem gilti 30% og með úrskurði dómnefndar sem sá um restina af prósentunum.  Það er ekki laust við að manni hafi hlýnað um hjartarætur þegar tilkynnt var að vor hefði sigrað keppnina enda var flutningurinn einstaklega fagmannlegur.  Verðlaunin voru ekki af verri endanum, gítar, míkrófónn, heddfónn, gjafabréf á Gistihúsið á Egilsstöðum og 30 hljóðverstímar auk farandverðlaunagrips.  Þessu fylgdi svo smá spilirí með Bergmál, en á laugardag var slútt með stórdansleik í Valaskjálf.

EM undanúrslit & úrslit

Þá er þetta búið,  því miður.  Það eina góða við það er að einhverjir vælukjór geta hætt að væla yfir því að fréttirnar hafi verið færðar til um klukkutíma.  En aðeins um leikina.

Undanúrslit, Spánn - Portúgal.  Fram að vítaspyrnukeppni var þetta einn leiðinlegasti leikur mótsins en Spánverjar hafa verið gagnrýndir fyrir að spila leiðinlega með því að láta boltann ganga manna á milli án þess að skapa sér mörg færi.  Samkvæmt tölfræðiupplýsingum voru aðeins tvö skot á rammann í venjulegum leiktíma, eitt í fyrri hálfleik og eitt í seinni.  Það var því kannski bara sanngjarnt að úrslitin réðust í vító en Spánverjar höfðu betur enda höfðu þeir smám saman náð yfirhöndinni inn á vellinum, sérstaklega eftir að Negredo fór af leikvelli.

Undanúrslit, Þýskaland - Ítalía.  Ítalir hafa komið allra liða mest á óvart í keppninni og margir voru búnir að afskrifa þá fyrir mótið en nú eru þeir komnir í úrslitin.  Ég hefði frekar viljað sjá hið skemmtilega lið Þýskalands í úrslitum en þeir klúðruðu sínum málum í leiknum við Ítalíu og það var ekki að sjá að þar væri sama lið að spila og var búið að spila alla hina leikina á mótinu.  Enda var þetta ekki sama lið.  Sama nafn en önnur leikaðferð.  Vanalega eru það ekki sigurstranglegri liðin sem breyta um leikaðferð, heldur þau sem talin eru önderdogs, eða undirhundar, eða bara lélegra lið.  En Þjóðverjar voru hræddir við Pirlo og ákvaðu að þjappa miðjumönnum sínum saman inn á miðjuna  til að stoppa hann. Það dugði ekki og Pirlo var góður,  maður mótsins að mínu mati.  Í síðari hálfleik reyndu Þjóðverjar svo að fara aftur í sinn venjulega gír en Prandelli stjóri Ítalanna sá í gegnum það og þétti fyrir allan leka með því að taka annan sóknarmanninn út af og setja inn menn í staðinn aftar á völlinn. 

Úrslit,  Spánn - Ítalía. Þessi leikur var aldrei spennandi.  Spánverjarnir höfðu þetta í hendi sinni allan tímann og eftir að Thiago Motta þurfti að fara meiddur útaf og Ítalir voru orðnir manni færri var þetta eiginlega bið eftir að leikurinn yrði búinn.   Spánverjar eru því besta lið Evrópu í dag og kannski með eitt besta landslið heims frá upphafi en ekkert lið hefur náð að vinna heims og álfutitla þrisvar í röð.  Að mínu mati er Pirlo maður mótsins, án hans hefðu Ítalir ekki komist svona langt og Prandelli er þjálfari mótsins en þrátt fyrir að margir væru búnir að afskrifa Ítalina fyrir mótið kom hann þeim alla leið í úrslitin.  Svo fær Torres hrós fyrir að fá gullskóinn en gulldrengurinn þurfti ekki langan tíma til að skora þessi mörk auk þess að leggja upp mörk fyrir félagana.

Að lokum, RUV fær engar þakkir fyrir umfjöllun sína um mótið.  EM stofan gerði lítið til að draga fram stemmingu mótsins.  Þegar Þorsteinn joð var með HM stofuna á síðasta stórmóti (og þar síðasta líka minnir mig)  voru dregin fram hin og þessi atriði  frá mótinu sem juku svo sannarlega við stemminguna.

Spánverjar eru bestir

Def Leppard

Jæja jæja, allt í lagi, ég get ekki þagað lengur yfir þessu.  Ég verð að fá að tala.  Ég held að mér líði eins og þeim sem hefur setið andspænis öðru fólki og sagt t.d. "Ég heiti X og ég er alkóhólisti".  Nú verð ég að viður kenna eitt. Ég heiti Kristján og ég hélt upp á Def Leppard þegar ég var yngri.

Ætli það hafi ekki verið árið 1985 sem þetta byrjaði.  Ég tók upp tvö lög með þeim úr lögum unga fólksins, sem ég held að Þorsteinn joð hafi stjórnað þá.  Þetta voru lögin Too late og Rock of ages.  Stuttu síðar áskotnaðist mér svo hljóðsnælda með öllum lögunum af breiðskífunni Pyromania og ég man að lagið Photograph var mikið spilað.  Þetta var allt mjög töff, melódíurnar og útsetningarnar voru sennilega það sem kveikti áhuga minn.  Útlitið skipti ekki máli þá.  Þetta var líka einhvern veginn rökrétt framhald af hlustun á Deep Purple, Whitesnake, Rainbow og Van Halen. 

Svo missti trommarinn aðra höndina í bílslysi og það var mjög töff að einhentur trommari væri að spila í heimsfrægri rokksveit.  Árið 1987 kom svo út breiðskífan Hysteria sem maður náttúrulega keypti og dásamaði enda voru goðin yfir alla gagnrýni hafin og á þeim tíma voru það lögin pour some sugar on me og love bites sem stóðu upp úr.  Svo liðu árin og ekki var minnst á Def Leppard, en að því kom að nafn sveitarinnar fór að heyrast stöku sinnum og þá fylgdi yfirleitt glott eða hæðnishlátur enda hafði sveitin fallið úr því að vera svöl rokkhljómsveit niður í það að þykja eitt af því hallærislega sem einkenndi níunda áratuginn eða eighties eins og þetta tímabil er gjarnan kallað á íslensku.  Það var því alltaf hálf vandræðalegt þegar hinir og þessir voru að hlægja að þessum fyrrum átrúnaðargoðum en auðvitað reyndi maður að kreista upp hlátur til samlætis þegar það átti við til þess að leyna skömminni.  Það sem varð kveikjan að þessum skrifum var Rock of ages en ég sá auglýsta bíómynd með þessu nafni fyrir nokkrum dögum og hef ekki getað hætt að hugsa um Def Leppard síðan með smá dassi af sektarkennd. En nú segi ég hingað og ekki lengra.  Ég er búinn að viðurkenna mistök mín en héðan í frá mun ég standa með mínum mönnum.  Þeir voru börn síns tíma, fórnarlömb aðstæðna en náðu því sem margur nær aldrei, að verða heimsfrægar rokkstjörnur

EM 8 liða úrslit

Það fór þá þannig að fjögur bestu lið keppninnar eru komin áfram. 

Portúgal Tékkland.  Portúgal vann Tékkland frekar létt þó að markamunur í leikslok hafi ekki verið mikill.  Portúgal er án efa með eitt besta lið mótsins og eru alveg eins líklegir og aðrir til að vinna keppnina en þar ábyrgð C. Ronaldo mikil.

Þýskaland Grikkland  Þessi leikur var leikur kattarins að músinni og var aldrei nein spurning,  Þjóðverjar eru mættir í þetta mót til þess að vinna það.  Þessi leikur var meira en fótboltaleikur í hugm margra Grikkja þar sem þeir kenna Þjóðverjum um efnahagsástandið í Grikklandi, enda púuðu griskir stuðningsmenn á Angelu Merkel kanslara.  Þjóðverjar eru sennilega með skemmtilegasta lið keppninnar og þeir virðast líka vera með það lið sem er með mestu breiddina en fyrir þennan leik gerði Low þrjár breytingar og enn á hann nokkur tromp upp í erminni.

Spánn Frakkland  Eignlega var þetta aldrei spurning, Spánverjar stjórnuðu leiknum og Frakkar eiga nokkuð í land með að ná fyrri styrk þó að þeir hafi bætt sig verulega frá síðustu tveimur stórmótum.  Þeir ógnuðu marki Spánverja varla í leiknum og Benzema hlýtur að vera líklegur kandídat í vonbrigði mótsins.

Ítalía England  Englendingar sterkir varnarlega en ekki nægilega góðir sóknarlega.  Það hefði komið sér vel fyrir þá að hafa Didier Drogba í sínum röðum en Ítalir voru mun sterkari og voru vel að sigrinum komnir.  Og Pirlo er frábær, virðist geta sent hárnákvæmar sendingar nánast blindandi, klárlega maður leiksins.

Það verður því slagur milli Íberíustórveldanna annars vegar og Möndulveldanna hinsvegar.  Ef Þjóðverjar leggja sig fram við að stöðva Pirlo og Spánverjar leggja sig fram við að stöðva Ronaldo ættu Þjóðverjar og Spánverjar að ná alla leið í úrslitaleikinn.

EM 3. umferð

Þá er riðlakeppninni á EM lokið.  Í A riðli komu Grikkir á óvart með því að komast áfram á kostnað Rússa.  Ég og fleiri hefðum frekar viljað, út frá skemmtanagildi, sjá Rússana áfram enda með mun skemmtilegra lið en Grikkirnir en fyrst þeir gátu ekki klárað það verkefni eiga þeir ekki erindi lengra.  Tékkarnir hafa vaxið frá fyrsta leik og komust líka áfram.

Í B riðli báru Þjóðverjar sigur úr bítum og virðast að vanda vera sigurstranglegir í keppninni.  Þýskt skipulag og agi í bland við leikgleði og hæfileika en ungir þýskir knattspyrnumenn koma inn í liðið hver á fætur öðrum, og hrein unun er að fylgjast með liðinu.  Portúgalir komust líka áfram en þeir eru með stórskemmtilegt lið og virðast vera mjög sterkir í þetta skiptið.  Alla jafna eru þeir með tvo til þrjá frábæra leikmenn en restin hálfgert rusl auk þess sem skipulag og varnarleikur virðast oft vefjast fyrir þeim.  Nú bregður svo við að varnarleikur og skipulag hafa verið í góðu lagi og vinstri bakvörður þeirra, Coentrao er án efa einn af leikmönnum keppninnar.  Hollendingar fóru hins vegar heim með skottin á milli fótanna en þeir voru alls ekki að standa undir væntingum.  Einhvern tímann var ég búinn að spá þeim sigri enda með frábæra einstaklinga en eins og ég hef áður sagt var þjálfarinn Marwijk ekki að ná neinu út úr liðinu.  Danirnir náðu ekki að velta þessum stórþjóðum af stalli enda átti enginn von á því fyrirfram en þó vakti einn leikmaður þeirra, Krohn Deli athygli mína fyrir vasklega framgöngu.

Í C riðli fór Spánn  áfram eins og allir voru búnir að spá, en þeir eru gríðarlega sterkir.  Það sem helst má gagnrýna þá fyrir er að þeir halda boltanum lengi innan liðsins án þess að mikil sköpun sé í gangi auk þess sem sóknarleikurinn er afar einhæfur þar sem boltanum er iðulega leikið upp miðjan völlinn og kantarnir eru vannýttir.  Ítalir hafa svo komið mörgum á óvart með ágætum leik og Pirlo hefur farið fyrir þeim með góðum leik.

Í D riðli náðu Englendingar að pota sér áfram þrátt fyrir að hafa ekki sýnt neitt sérstaka frammistöðu.  Hver veit, kannski er eitthvað skrifað í skýin og Englendingar fara alla leið.  Ég vona samt ekki.  Frakkarnir hafa líka sýnt betri takta á þessu móti en undanfarin ár og Menez er athyglisverður leikmaður. 

Átta liða úrslitin verða án efa stórskemmtileg.

England sigurvegari í D-riðli - mætir Ítalíu

EM 2. umferð

Þá er 2. umferð á þessu stórskemmtilega Evrópumóti lokið.  Rússarnir virðast vera bestir í A - riðlinum og þeir eru með mjög skemmtilegt lið, þrátt fyrir að ná aðeins jafntefli gegn Pólverjum í bráðskemmtilegum leik.

Í B - riðlinum átti Þýskaland í tiltölulega litlum vandræðum með Hollendinga sem virðast vera algjörlega andlausir og ef ég væri Hollenskur knattspyrnusambandsstjóri myndi ég leggja það til að Bernt Van Marvijk verði rekinn enda hefur liðið verið frekar leiðinlegt síðustu árin, þrátt fyrir að hafa komist í úrslit á HM síðast spilaði liðið afskaplega leiðinlegan bolta og það hefur ekki skánað nú á EM.  Þetta er hundfúlt af því að Hollendingar hafa í gegnum tíðina verið skemmtilegir og þeir ættu að geta verið það núna miðað við mannskapinn.  Þjóðverjar eru hins vegar stórskemmtilegir og mér er farið að líka vel við þennan Gomez.

Þrátt fyrir að það sé gaman að hafa Írana á EM þá verður að segjast eins og er að þeir eiga lítið erindi þarna greyin, mörgum klössum neðan við þær þjóðir sem þeir hafa leikið gegn, Króata og Spánverja.  Það er ekki laust við að hin fleygu orð komi upp í hugann, "Það hefði verið fínt ef þeir hefðu leyft okkur að fá boltann".  Kannski var bara gott hjá Írum að sleppa með 4 - 0.  Maður vorkennir þeim samt eiginlega, hins vegar er gaman að sjá írsku stuðningsmennina, þó að liðið þeirra sé að tapa 4 - 0 þá syngja þeir hástöfum og skemmta sér.   Ítalir og Króatar gerðu náttúrulega jafntefli líkt og samið hefði verið um það fyrirfram.

Þrátt fyrir að vera hvorki bestu né skemmtilegustu liðin á EM, þá var leikur Englendinga og Svía stórskemmtilegur en því miður náðu frændur okkar Svíar ekki að koma í veg fyrir sigur Tjallanna.  Gæðin hjá Frökkunum eru samt að koma betur í ljós og fróðlegt verður að sjá hversu langt þeir fara.

1. umferð

Þá er fyrstu umferð EM lokið og línur ekki farnar að skýrast, ótrúlegt en satt, en ýmislegt athyglisvert  hefur litið dagsins ljós.  Í þessari fyrstu umferð sýndu Rússar sýndu bestan leik og þeir verða allrar athygli verðir í komandi leikjum,  þeir eru líka með einn athyglisverðasta leikmann umferðarinnar en hann ber það hljómfagra nafna Dzagoev.  Danir komu allra liða mest á óvart með því að vinna hina sigurstranglegu Hollendinga en Ítalir stóðu sig líka betur en menn höfðu reiknað með en þeir náðu jafntefli við hið gríðarsterka lið Spánverja sem að þessu sinni spilaði án framherja og notaði sjaldséð leikkerfi 4-6-0 (eða 4-2-4-0 ef menn vilja vera nákvæmir).    Tékkar eru sennilega með eitt lélegasta liðið í keppninni ásamt Írum, en Írar með skemmtilegustu stuðningsmennina og eiginlega ætti alltaf að hleypa Írum í úrslitakeppni bara til þess að fá stemminguna sem fylgir áhorfendum.  Leiðinlegasti leikur umferðarinnar var án efa leikur Englendinga og Frakka   Úrslitin í fyrstu umferðinni segja hins vegar ekkert um áframhaldandi gengi liðanna en samkvæmt sögunni er það nánast undantekning ef sigurvegarar mótsins gera einhverjar rósir í fyrsta leik enda eru menn afar varfærnir til að byrja með.

Gleðilega EM

Þá er stóra stundin að renna upp,  EM í knattsyrnu hefst í dag og við knattspyrnuáhugamenn eigum von á veislu næstu dagana.  Vonandi stendur keppnin undir væntingum og ef hún verður jaf skemmtileg og HM var fyrir tveimur árum ætti enginn að verða fyrir vonbrigðum.  Auðvitað verður maður að bregða sér í líki kolkrabbans Páls sem stóð sig svo vel fyrir tveimur árum þegar hann spáði fyrir um úrslit keppninnar.   Þau lið sem mér finnst líklegt að komist lengst eru Spánn, Holland, Þýskaland, Frakkland.  Eigum við ekki bara að segja að Holendingar taki þetta, þó svo að ég sé ekki hrifinn af þeim leikstíl sem Marwijk þjálfari þeirra lætur þá spila, en auðvitað mun maður halda með Þjóðverjum eins og á flestum þessum mótum.

Markahæstur verður Robin Van Persie (Holland)

Lið sem gætu komið á óvart væru Svíþjóð og Úkraína.

Svo eru nokkrir ungir leikmenn sem gaman verður að fylgjast með hvort ná að skjóta sér hærra upp á knattspyrnustjörnuhimininn.  Andre Schurrle (Þýskaland),  Yann M'Vila (Frakkland), Christian Eriksen (Danmörk),  Gregory Van Der Wiel (Holland),  AndriyYarmolenko (Úkraína). 

Nú er bara að setja sig í stellingar, góða skemmtun.