Þegar við Rich Hall fórum í pub quiz

Í gær fór ég ásamt tveimur félögum mínum á Pub Quiz, eða barsvar, á öldurhúsi hér í bæ sem ber nafnið Helgis og er af mörgum talið vera eitt hið besta af slíkum húsum hér í bæ. Að þessu sinni var tónlistarþema og töldum við það henta okkur ágætlega enda vel að okkur um allskonar tónlist. Spurningarnar sem bornar voru upp hentuðu okkur reyndar ekki alveg nógu vel þar sem við gátum ekki svarað nokkrum staðbundnum spurningum um Orkneysnka tónlist og aðrar voru nokkuð strembnar, eins og t.d. þessi: nefnið tíu plötur með Áströlsku hljómsveitinni AC/DC sem væri e.t.v. mögulegt að svara ef maður hefði nægan tíma en ein mínúta á barsvari er örugglega ekki nóg.

Þar sem allt að sex manns máttu vera í hverju liði höfðu tveir menn á næsta borði boðist til þess að ganga í lið með okkur sem við auðvitað samþykktum.  Ekki þekkti ég þessa menn sem sátu hjá okkur en þegar fólk fór að stoppa við borðið okkar og biðja um eiginhandaráritanir og myndir með öðrum þeirra þótti mér nokkuð ljóst að hér færi maður sem margir þekktu til og ætti aðdáendur. Ég komst þó að því að hann heitir Rich og er skemmtikraftur en þeir félagar voru á ferðalagi um Bretland til þess að halda uppistandsskemmtanir og síðar liggur leið þeirra til Ástralíu. Manni líður hálf kjánalega þegar setið er til borðs með einhverjum sem allir þekkja nema maður sjálfur, maður kann ekki við að spyrja of beinskeytt um hagi viðkomandi af ótta við að móðga viðkomandi sem væntalega reiknar með að allir þekki hann. Alla vega komst ég að því eftir að hann var farinn að hann heitir Rich Hall og er sennilega frægasti maður sem ég hef hitt. Allavega sá fræagsti sem ég hef setið og sötrað bjór með og verið með í pub quiz liði. Hann er sumsé heimsfrægur uppistandsgrínisti og hefur komið víða fram bæði á sviði og í sjónvarpi en hann var t.d. fastur gestur David Letterman, kemur oft fram í QI, hefur komið fram á live at the Apollo, hefur gert 4 gamanþáttaraðir á BBC, hefur komið fram í Top Gear og margt fleira.

Þess má líka geta að Matt Groening, skapari Simpson þáttanna segir að Rich þessi Hall sé fyrirmynd sín að einni persónu þáttanna, barþjóninum Moe.

 

 

 

 

 

 

 

 

 

 

 

 

Og talandi um Simpsons, fyrst ég er staddur á Orkneyjum þá má geta þess að hinn stórskemmtilegi karakter Willie the groundskeeper á, samkvæmt fyrrnefndum Matt, að vera frá Kirkwall á Orkneyjum.

 

 

 

 

 

 

 

 

 

Já ýmsar eru tengingarnar. Nú veit ég ekki hvort margir Íslendingar þekkja þennan Rich en hann sagði að hann langaði til að halda uppistandsskemmtun á Íslandi það þyrfti bara eitt símtal og hann myndi strax fara. Nú eru eflaust sumir að velta fyrir sér hvort hann var fyndinn eða ekki og eigum við ekki bara að segja að hann hafi fallið inn í hópinn. Þó að ég hafi ekki séð þennan Rich áður, hef ég þó nokkuð gaman af þeim sem kallast því fallega orði “uppistandarar” og eru Michael MacIntyre, Lee Nelson og skotinn Kevin Bridges í mestu uppáhaldi.   Við enduðum í 6. sæti af 7. Það er skammarlegt.

Athugasemdir

[Dröfn Freysdóttir (IP-tala skráð) 5.2.2016 kl. 23:29]

SKil þig Kristján!! ég sat einu sinni á borði með fiskikónginum, hvort það var ekki bara eftir pubquis í Löngu og það vissu allir nema ég hver maðurinn væri. Það var ekki fyrr en hann var farinn á salernið sem ég þorði að spurja hver þetta væri því það var augljóst að hann var þekktur.  Ég fékk auðvitað ,,veistu í alvöru ekki hver þetta er" svarið og ég varð að játa að ég vissi það ekki. Mér leið bara nákvæmlega ekkert betur eftir að vita hver þetta væri. Hahah ég varð að koma með eina svo aula útgáfu af þinni. Þín saga er nú aðeins betri en mín en gaman að þessu.  Knús á liðið!

[S Kristján Ingimarsson, 6.2.2016 kl. 08:17]

Já þetta getur verið frekar vandræðalegt, maður veit ekki hvort maður á að afhjúpa fáfræði sína og um leið eiga á hættu að móðga viðkomandi eða bara spila með og þykjast þekkja manneskjuna.  Gaman að þessu.